त्याने आधी कोयत्याने पत्नीचे हात, पाय आणि शीर तोडले; भिवंडीतील 'त्या' ड्रमने फोडली खुनाला वाचा!

भिवंडी: भिवंडीत सोनाळे येथे 8 दिवसांपूर्वी मुंबई महापालिकेच्या पाईपलाईन रोडवर एका महिलेचा हात, पाय आणि मुंडके छाटून निर्वस्त्र मृतदेह प्लास्टिकच्या ड्रममध्ये कोंबून फेकून दिल्याची खळबळनजक घटना घडली होती. या घटनेचा पोलिसांनी अखेर छडा लावला असून या प्रकरणी मृत महिलेच्या पतीला अटक करण्यात आली आहे. 

ही घटना पतीने चारित्र्याच्या संशयावरून केल्याचे पोलीस तपासात उघड झालं आहे. सायरा हमीद सरदार (27 ) असं निर्घृण खून झालेल्या महिलेचं नाव आहे. सदर महिलेची हत्या तिचा पती हमीद मदरअली सरदार (27) यानेच केल्याचं पोलीस तपासात उघड झालं आहे.

काय घडलं नेमकं?

सरदार दाम्पत्य मुळचे पश्चिम बंगालचे रहिवाशी असून ते देवजीनगर येथे वास्तव्यास होते. हमीद हा नेहमीच पत्नीच्या चारित्र्यावर संशय घेऊन तिला मारहाण करीत होता. पती हमीद हा कामावर निघून गेल्यानंतर ती घरातून निघून जात होती. त्यामुळे तिला वारंवार समजावून देखील ती ऐकत नसल्यानं संतापलेल्या हमीद याने तिचा कोयत्याने गळा, उजवा हात आणि दोन पाय गुडघ्यापासून कापून ते भाड्याच्या टेंपोद्वारे फेणापाडा येथील पाईपलाईनच्या नाल्यात तर धड प्लास्टिकच्या ड्रममध्ये भरून तो सोनाळे हद्दीत फेकून दिला होता.

असा लागला छडा

सदरचा प्लास्टिक ड्रम हा तारापूर येथील केमिकल कंपनीतून भिवंडीतील एका डाईंगमध्ये आणण्यात आला होता. तो एका कामगाराने नेवून त्याची विक्री भंगारवाल्याला केली होती. त्याच्याकडून ड्रम हमीद याने खरेदी केला होता. त्या ड्रममध्ये पत्नीची हत्या केलेला मृतदेह कोंबून तो भाड्याने टेम्पो खरेदी करून त्या वाटे मृतदेह फेकून दिला होता. सदरचा ड्रमचा प्रवास सीसीटीव्ही कॅमेऱ्यात कैद झाला होता. त्याचा आधार घेऊन पोलिसांनी महिलेच्या खूनाचा उलगडा केला आहे.  

न्यायालयीन कोठडी

विशेष म्हणजे, मृत महिलेची ओळख पटू नये यासाठी मारेकरी पती हमीद याने निर्वस्त्र मृतदेह एका प्लास्टिकच्या ड्रममध्ये भरून तो सोनाळे गावाच्या हद्दीतील मुंबई महापालिकेच्या पाईपलाईन लगत असलेल्या सह्याद्री रेडिमिक्स प्लांटच्या समोर फेकून दिला होता. या खूनाचा तपास करण्यासाठी पोलिसांपुढे ठोस पुरावा नसताना मृतदेह कोंबलेला प्लास्टिक ड्रमचा आधार घेऊन वरिष्ठ पोलीस निरीक्षक संजय हजारे यांच्या मार्गदर्शनाखाली पंकज घाटकर ,पोलीस हवालदार अनिल महाजन ,कैलास वाढविंदे ,जयेश मुकादम आदींच्या पोलीस पथकाने त्या आधारे खूनी पती हमीद मदरअली सरदर ( २७ ) यास ताब्यात घेऊन अटक केली. त्याला न्यायालयाने २६ एप्रिलपर्यंत पोलीस कोठडी सुनावली आहे.